Pangolihon Anak, manang Pamuli Boru (Ulaon Marunjuk, manang Ulaon Mangadati)

Pangolihon Anak, manang Pamuli Boru (Ulaon Marunjuk, manang Ulaon Mangadati)

1.      Mangarisika

Berangkat ma perwakilan sian paranak tu huta ni parboru tarsongon na marsitandaan. Molo hira-hira na tarbukka do pintu ni parboru laos dilehon perwakilan ni paranak ma tarsongon panandaion tu parboru tarsongon; cincin emas dll.

2.      Marhori-hori Dinding

Molo dung marsitandaan jala marsihaholongan si baoa dohot si boru, dipaboa ma i tu angka natua-tuana. Disuru natua-tua ni par-anak ma manang na piga halak boruna manopot boru ni parboru songon na marsitandaan, huhut manghata-hatai taringot tu angka sangkap nasida.

Di ulaon marhori-hori dinding ndang mardalan do pe adat-paradaton. Alai somalna diboan paranak do songon buah tangan nasida, i ma berupa lampet, kue manang buah-buahan. Prinsipna hira masipasahatan pangidoan do paranak dohot parboru, i ma taringot tu rumang ni ulaon, godang ni sinamot, godang ni ulos, godang ni undangan, dohot angka na asing. Hira sian panghataion na marhori-hori dingding on do dasar ni panghataion di ulaon na mangihut. Lapatanna, angka dos ni roha ni hasuhuton do tarida di son. Jala molo dung adong dos roha nasida, ditontuhon ma sada ari (tingki) asa ro paranak laho patua hata dohot marhusip (mangarang-rangi).  

3.      Marhusip

Ala naung dos roha ni paranak dohot parboru, di ari naung ditontuhon, ro ma paranak dohot manang piga uduranna (dongan tubuna, boru, bere) mandapothon parboru. Diboan do di si sipanganon na marsaudara jala tangkas do i dipasahat dohot dihatahon lapatanna tu parboru. Parboru pe dipatupa do dekke laho sipasahatonna tu paranak. Di ulaon i, dijou parboru do manang piga dongan tubuna, boru dohot berena, songon i dongan sahuta. Dung sidung marsipanganon dipungka ma panghataion.

Songon on ma panghataion :

RP Pb

Dung jolo dipahantus taringot tu tudu-tudu ni sipanganon (dialusi paranak surungsurung muna doi raja nami).

Sai jolo ninangnang do asa ninungnung, Raja ni Boru, ba sai jolo pinangan do asa sinungkun. Ba nunga bosur hami mangan indahan na las, sagat na marlompan juhut, butong minum aek sitiotio, sai pamurnas ma i tu daging, saudara tu bohi, ba nuaeng pe paboa hamu ma hinarohonmuna dohot lapatan ni sipanganon i. Tangkas ma paboa hamu, aha sibegeon ni sipareon dohot sipeopon ni roha. Boti ma.

RP Pa

Mauliate ma, Rajanami. Jumolo ma hami mandok mauliate tu Amanta Debata, ala hipas do hamu dapotnami, hami pe hipas do mandapothon hamu. Nungnga hundul hami di amak tiar, ba sai tiar ma tutu panggabean, tiar nang parhorasan di hita saluhutna. Taringot tu indahan masak na huboan hami, songon nidok ni natuatua do dohononami:

‘’Mardangka tanduk, marbuhu holiholi.

Godang sibutongbutong, otik sipir ni tondi,

Sipasindak panaili ma i, sipaneang holiholi’’.

“Asa sititi ma sihompa, golanggolang pangarahutna.

Tung so sadia pe i sipanganon na huboan hami i, sai godang ma pinasuna’’.

Anggo sintuhun ni indahan masak, panggabean parhorasan do, Rajanami. Boti ma.

RP Pb

Mauliate ma, las rohanami umbegesa. Alai ia marangkup do na uli, mardongan do na denggan, siangkup ni panggabean parhorasan, ba tung tangkas ma dipaboa hamu.

“Dia ma langkatna, dia ma unokna.

Dia ma hatana dia na nidokna”.

Boti ma, da.

RP Pa

Toho do i, Rajanami, sai marangkup do na uli mardongan do na denggan, asa tampak songon na hundul, siudurna songon na mardalan. Paboaon ma tu Raja nami na gompang di pusupusu na solot di ateatenami, didok hata ni situa-tua balga bulu godang dengan bahenon hite-hite, mangodang anak manang boru denggan ma hot ripe. Nungga magodang anak nami beremuna raja nami jala huboto hami nugga balga maen nami boru ni raja i, pendek hata dohonon nasida nungga masihaholongan jala tangkas nungga dijalo boru muna hata ni anak nami, alai ni i raja nami napatua hata ni anak nami ma hami, i ma siangkup ni panggabean parhorasan i raja nami, botima. Dung digabehon parboru sude nai, laos di uduti ma tu na marhusip-husip nagogo.

4.      Partumpolon/Martumpol

Partumpolon (parpadanan) ulaon parhuriaon do on. Ndang apala pinatorang be on, ala tangkas do taantusi hira-hira lapatan dohot tujuan ni partumpolon i. Naporlu sipingkiranta ima taringot tu angka ise do na laho sigokhononta tu ulaon partumpolon i. Molo nasomal taida, sahat do tu horong ni angka hula-hula dohot tulang. Hape somalna muse taulahon di Jabotabek sekitarna, dung sidung acara partumpolon di gareja pintor diuduti do tu ulaon martonggo raja manang marria raja. Adong na deba laos di aula manang di gedung dipatupa ulaon martongo raja manang marria raja, alai adong do na mangulahonsa di bagas ni parboru manang paranak, saguru tu situasi dohot kondisi ni hasuhuton do i.

Sungkun-sungkun tu hita, beha molo dung sidung partumpolon langsung dipatupa ulaon marhata sinamot manang didok pudun saut. Alana di tingki i, nunga hira lengkap undangan sian angka tutur, songoni sian horong ni hula-hula dohot tulang. Alai margeser (berubah) ma muse ari (tingki) na martonggo raja manang marria raja.

Nunga adong di Jakarta dohot nahumaliangna on mangulahon ulaon marhata sinamot (pudun saut) dung sidung acara partumpolon, alai saguru ma i tu dos ni roha ni hasuhuton paranak dohot parboru.

5.      Tonggo Raja-Marria Raja

Molo adong unjuk/pangolihon anak manang pamuli boru, dipatupa do ulaon tonggoraja manang riaraja. Di si ma tangkas, dihatai, dituturi/ditiroi hasuhuton, lumobi suhut bolon.

Sitaringotan di tonggoraja/ riaraja, i ma :

a)      Parborhat ni boru muli (dialap jual/ditaruhon jual);

b)      Godang ni sinamot /ulos herbang;

c)      Godang ni siharaon dohot na pasahat undangan;

d)      Daftar ni napasahat/namanjalo ulos herbang, dohot daftar ni sipasahat ulos holong tu penganten;

e)      Daftar namajalo / napasahat todoan suhi ni ampang naopat dohot panandaion;

f)       Mangatur angka parhobas/sijalo tamue;

g)      Parjambaran;

h)      Daftar ni horong ni hulahula /tulang;

i)        D.n.a. na ringkot di ulaon unjuk i.

6.      Marhata Sinamot

Dung sidung marsipanganon, marbagi jambar dohot manjalo pangurupion (tumpak) pihak paranak, pintor diparade do inganan laho manghatai. Somalna tingki pesta unjuk na ma marhata sinamot. On pe holan formalitas na ma, ai nungnga jolo dihatai (dirangrangi) hian di tingki marhusip.

Tingki marhusip nungnga ditontuhon hian, misalna ;

v  Parborhat ni boru muli, dialap jual manang ditaruhon jual ;

v  Godang ni Ssinamot sitombol, suhi ni ampang na opat, panandaion;

v  Ulos herbang 11bulung;

v  Pinggan panganan dohot ulosulos, masialusi sian ibana be, manang masinangkohi tangga ni balatukna be;

v  Ulaon i, ulaon sadari;

v  Parjambaron sidapot soluk naro.

v  Godang ni undangan.

Laos i na ma sitariashononhon tingki marhata sinamot di jolo ni angka raja.

Dung rade sude kedua belah pihak, termasuk hulahula dohot tulang, parjolo do paranak pasahathon pinggan panungkunan marisi boras, demban dohot ringgit sitio soara (uang) 4 l bulung tu raja parhata ni parboru.

Tarsongon on ma panghataion :

RP Pb

Di hamu Raja ni Parboruonnami, di son nungnga dipasahat hamu tu hami pinggan panungkunan na hot di hundulanna na marisi demban sirara uruk, demban mauliate, mauliate ma tadok tu Amanta Debata ala hipas do hamu ro mandapothon hami, jala hami pe hipashipas do dapotmuna.

Dipasabat hamu do muse di son boras sipir ni tondi, pir ma pongki bahulbahul pansalongan , sai pir ma tondinta tu tambana nang pansamotan. Laos dipasahat hamu do muse di son ringgit sitio soara na pinungka ni pamarenta sipalas roha ni angka raja.

Nungnga hundul hita di amak tiar, di jabunta na marampang na marjual on, jabu sibaganding tua on, nungnga hupangan hami sipanganon na binoanmuna i, bosur hami mangan indahan na las, sagat na marlompan juhut, butong minum aek sitiotio, sai pamurnas ma i tu daging saudara tu bohi, sipasindak panailisi ma i sipaneang holiholi. Asa bagot na marhalto ma na tubu di robean, horas ma hami na manganton tu tambana di hamu na mangalean.

Bangkona do i, Amangboru, sai jolo ninangnang do asa ninungnung, sai Jjolo pinangan do asa sinungkun. On pe, Amangboru, na manungkun ma hami nuaeng di sintuhun ni indahan masak dohot lompan na tabo i, tangkas ma dipaboa Amangboru. Boti ma.

Dibuat ma 3 bulung ringgit sitio soara i, laos dipasahat ma muse pinggan panungkunan i tu paranak asa dialusi.

RP Pa

Gabe ma jala horas, Rajanami, sai asi ma rohani Amanta Debata marhitehite anakna Jesus Kristus. Di hita sasudena, asa sai lam ganda ma sinadongan, asa tarpatupa hami nian na tumabo sian on laho pasangaphon hamu hulahulanami.

Taringot tu sipanganon na huboan hami i, Rajanami, ba sititi ma sihompa, golanggolang pangarahutna, tung so sadia pe sipanganon i sai godang ma pinasuna.

Sintuhun ni indahan masak dohot lompan na tabo, ba panggabean parhorasan do, Rajanami. Boti ma.

RP Pb

Gabe ma tutu angkup ni na horas, sai sahat ma na uli tumpahon ni Amanta Martua Debata marhitehite Anakna, Jesus Kristus. Sai dapot ma nian songon hata ni umpasa:

“Bona ni aek puli tu dolok ni sitapongan,

sai ro ma angka na uli lam ganda nang pansamotan”.

Alai , Amangboru, songon na nidok ni angka natuatua, sai marangkup do na uli, mardongan do na denggan, asa tampak songon na hundul, siudurna songon na mardalan, siangkup ni panggabean parhorasan, tangkas ma dipaboa Amangboru, dia ma langkatna, dia ma unokna, dia ma hatana, dia na nidokna. Boti ma da, Amangboru.

RP Pa

Rajanami, Raja Bolon, toho do i na nidokmuna i, sai marangkup do tutu na uli, mardongan do na denggan, siangkupna songon na hundul, siudurna songon na mardalan.

Jumolo ma hami marsomba ujung dohot jarijari sampulu tu hamu, Rajanami. Taringot tu haroronami, na adong do na solot di ateatenami, gompang di pusupusunami na naeng sihatahononnami tu hamu, alai molo tung adong annon hata na hurang manang na lobi, Rajanami, ba anju hamu ma hami, nanget hami ajari hamu;

“Ampapaga dolok tu ampapaga toruan,

hita do marsogot, laos hita do haduan”.

Jadi songon on do, Rajanami, sian dos ni rohanta rap do hita nangkin mamboan ianakhonta tu jolo ni huria laho manjalo pasupasu parbagason sian Tuhanta. Nungnga dijalo nasida i marhitehite naposona. Alai, Rajanami, anggo adat na gok ndang digarar hami dope tu Raja i. Molo mangoli anak, pasahaton ma sinamot, molo muli boru, jaloon ma bolina.

Molo ditolopi hamu do, Rajanami, uli otik godang so sadia, ba haroronami na pasahat boli ni boru ni Raja i do, huhut mangulahon adat na gok. Boti ma, Rajanami.

RP Pb

Di hamu, Parboruonnami, las do rohanami umbege hatamunai, sai rongkap ni borunami ma i berenami i, rongkapna gabe, rongkapna mamora, jala rongkapna sarimatua.

Taringot tu sinamot ni borunami sipalas rohanami, on do sidohononnami:

 “Ndang tuktuhan batu, dakdahan simbora.

Ndang tuturan datu, ajaran na marroha”.

Na malo do hamu jala sigodang botobotoan, raja na bisuk ompu ni parbinotoan. Tangkas do tinanda hamu, ndada paidua hamu di sinadongan. Songon nidok ni umpasa :

“Pat ni gaja do tu pat ni hora.

Anak ni Raja do hamu huhut pahompu ni na mora,

sihorus na gukguk do hamu, sitambai na longa”.

Jadi nungnga pitu lilinami, paualu jugianami, nungnga uli nipinami ai gohanmu ma hajutnami. On pe, Raja ni Boru, goari hamu sian i sadasada sinamot i, piga horbo, piga lombu, piga hoda, piga rantiti mas, sadia godang ringgit sitio soara, asa tangkas hubege hami, jala tangkas dibege angka raja. Boti ma da, Amangboru.

RP Pa

Di hamu, Hulahulanami,

Marsomba ujung hami marsomba huhuasi tu tua dohot sahala ni angka raja. Tutu do i, Rajanami, ianggo ala ni sangapmuna dohot balga ni partubumuna na patut do hamu manjalo angka na ginoaranmuna i.

Jala tutu do nang na nidokmuna i taringot tu hamoraon ni ompunami najolo. Torop hian do pinahanna, alai, Rajanami, nungnga sude i hona gadis laho pasingkolahon angka beremuna on. Hami pe nian, Rajanami, sai naeng do mangalehon sinamot na godang, asa sangap hamu, sangap nang hami, alai beha ma bahenon, Rajanami, songon ni dok ni umpasa:

” Duru ni harangan, hatubuan ni tadatada

hansit do tangan mandanggurhon na soada”.

Umbahen na barani hami mandapothon hamu, na huboto hami do ndada gulut di hepeng hamu, gulut di holong do, pos do rohanami ndada paurahonmu hami di hapogosonnami.

Asa, Rajanami, tapasada ma pangidoanmuna i gabe ringgit sitio soara, asa sada tungkuson ni inanta soripada. Jala molo boi, Rajanami, pangidoannami sisahali manombahon i ma hami, jala sinamot sitombol hatahononnami. Molo dung satolop Raja i, asa pintor huhatahon hami. I ma jolo, Rajanami, pangidoannami. Boti ma, Rajanami.

RP Pb

Molo i do pangidoanmu sisahali manombahon i, jala sinamot sitombol, ndang pola haboratan hami asal ma pintor toho jala godang, nungnga las rohanami, alai adong do hami di son na marhaha-maranggi, borunami dohot berenami, aleale/dongan sahuta lumobi di sude hulahula dohot tulangnami, ba jolo masisungkunan ma jolo hami. Boha roha muna, Amangboru?

RP Pa

Mauliate, Rajanami.

Raja Parhata ni Parboru

Parjolo ma hupasahat hami tu hamu, Boru dohot Berenami. Boha pandokmu di pangidoan ni paribanmu di sinamot ni boru nami sisahali mandok, Jala sinamot sitombol ninna nasida. Alusi hamu ma.

Sian Boru dohot Bere

Di hamu, Hulahulanami, mauliate do dohononnami tu hamu ala dipasahat hamu panghataion on tu hami. Tangkas do hutanda hami hamu, Hulahula- nami, angka na burju do marboru. Ba nang tu dongan pariban dohonon do molo tung sahali mandok hamu, jala sinamot sitombol, ba tung godang ma hatahon hamu, asa las roha ni hulahulanta.

Songon i ma sian hami boru dohot bere, siihuthon nauli ma hami raja nami. Boti ma.

RP Pb

Mauliate ma di hamu boru dohot bere. Nuaeng pinasahat ma tu hamu, Aleale dohot Dongan Sahuta.

Sian Aleale/Dongan Sahuta

Pangidoannami tu hamu na marhula-marboru dos ma rohamu, ai molo dos roha sude do saut, jala sitolopi na uli ma hami. Boti ma.

RP Pb

Mauliate ma di hamu. Ba tu hita na marhaha - maranggi ma, pinasahat ma tu Haha Doli (Anggi Doli).

Sian Haha Doli ( Anggi Doli )

Mauliate ma di hamu, Anggi Doli/Haha Doli. Nian sisada hata do hita sisada ulaon, alai atik pe songon i, gomos pangidoon tu parboruon. Hamu, Amangborunami, tangkas do hamu hutanda hami, toho do ndada paidua hamu anggo di sinadongan, ai;

“Barita ni lampedang, mardangka bulung bira.

Barita ni hamoraonmuna, tarbarita do ro di dia”.

Molo tung sahali mandok ma hamu, jala sinamot sitombol, ba pintor godang ma hatahon hamu asa tung las rohanami. Songon i ma sian hami Haha Doli (Anggi Doli) muna.

Catatan : Nuaeng on tu hahadoli/anggi doli nungga pintor didok raja parhata sisada hata ma hita.

RP Pb

Tu hamu, Hulahulanami dohot sude Tulangnami. Nungnga tangkas dipaihutihut hamu na masielehan hami taringot tu sinamot ni beremu. On pe hupasahat hami ma tu hamuasa tuturi hamu ma hami. Sude ma hamu Hulahula dohot Tulang na hupandohi hami.

Hata sian Hulahula (somalna mewakili sude Hulahula dohot Tulang)

Di hamu, Parboruannami, tangkas do hupaihutihut hami hamu na masielehan jala masipaolooloan di sinamot ni berenami, nungnga dos rohamu huida hami. Aek godang tu aek laut, dos ni roha do tutu sibahen na saut. Jadi sian hami hulahula dohot tulang tong do songon ni dok ni umpasa dohononnami ;

“Balintang ma pagabe, tu mandakkon sitadoan.

Arimu ma horas jala gabe, molo masipaolooloan”.

Songon i ma sian hami, sude Hulahula dohot Tulang.

RP Pb

Mauliate ma di hamu sude Hulahula dohot Tulangnami di sude panuturionmuna di hami. On pe di hamu, Parboruonnami, tangkas ma hatahon hamu godang ni sinamot ni borunami. Boti ma.

Catatan : Boi do jolo dipangido asa di hatahon (digollit) paranak godang ni sinamot nanaeng sipasahatonna, ipe asa di pasahat raja parhata ni parboru pangkataion tu horong ni hula-hula dohot tulang.

RP Pa

Mauliate ma, Rajanami, alai andorang so huhatahon hami somba ni uhumnami, parjolo ma jolo hualap hami hata sian borunami dohot berenami, lumobi sian hulahula dohot tulangnami. Ai anggo sian angka dongan tubunami ba sisada hata do hami.

Hata sian Boru dohot Bere ni Paranak

Muliate ma di hamu, Rajanami, ala dipasahat hamu do panghataion on tu hami boru dohot bere.

“Durung do tutu boru, tomburan hulahula.

Ingkon do tumpahan ni boru na dokdokdi hulahula”.

Ba na rap mangelek ma hita , Rajanami, sombahon hamu ma sinamot si tombol i, asa tung pintor las roha ni hulahula ni hulahulanami. Boti ma sian hami boru dohot bere.

Mauliate ma.

Hata sian Hulahula dohot Tulang ni Paranak

Nungnga tangkas hupaihutihut hami hamu di sude panghataionmuna di sinamot ni berenami. Anggo parboru sai naeng do nian godang sinamot ni boruna, paranak pe sangap do molo boi godang dilehon sinamot. Jadi pangidoan nami, denggan ma hamu masipaolooloan, asa saut songon ni dok ni umpasa i:

”Balintang ma pagabe, tumandakkon sitadoan.

Ari mu ma horas jala gabe, molo masipaolooloan”.

Songon i ma sian hami hulahula dohot tulang. Boti ma.

RP Pa

Rajanami, anggo utang ni boru tu hulahula ndang na marna sae. Didok angka natuatua na parjolo, ndang suda ari manggarar utang tu hulahula. Ala ni i, molo tung so sadia pe husombahon hami apala di tingki on, las ma rohamuna manjalo.

Nunga huelek hami Raja i asa sahali manombahon ma hami jala sinamot sitombol ma, taringot tu suhi ni ampang na opat, pos rohamu, Rajanami, pasahatonnami do i songon panandaion.

Jadi hupasahat hami ma sinamot sitombol godangna Rp. ........,- Gabehon hamu ma, Rajanami. Boti ma.

RP Pb

Mauliate ma di hamu parboruonnami, nungnga dihatahon hamu sinamot ni borunami godangna Rp. .......,- sitombol, jala alusanmuna do suhi ni ampang na opat.

Anggo hami nungnga sisada hata, hami na marhaha maranggi, borunami dohot berenami, lumobi nungnga hupangido hami panuturion sian sude hulahula dohot tulangnami, alai ndang husungkun hami do pe anggo suhut sihabolonannami. Ba ipe nuaeng, di hamu suhut bolon, nungnga tangkas dipaihutihut hamu panghataionnami di godang ni sinamot ni borunta. Nungnga tung tangkas huelek hami parboruonta, ba Rp .......,- ma ninna sitombol. Songon nidok ni natuatua; :

“Lata pe na rata, sai duhutduhut do sibutbuton.

Hata pe na raja, sai suhut bolon do sisuugkunon”.

Boi do tong pangkeon umpasa on:

“Lasiak narara binahen tu panutuan.

Raja pe na raja, sai suhut do panungkunan”.

Pinasahat ma tu hamu hasuhuton. Boti ma.

Hata sian Suhut Bolon ( somalna paidua ni hasuhuton)

Di hamu, Raja Parhatanami, raja do hamu naung pinaraja, tandokmu do tandoknami, hatamu do hatanami, molo miak ninna hamu raja, miak do dohonon nami, asa :

“ Barisbaris ni gaja di rura pangaloan.

Molo marsuru raja, ba ingkon do oloan.

Molo nioloan, anggiat dapot angka parsaulian”.

Boti ma sian hami, hasuhuton.

RP Pb

Mauliate ma di hamu, Suhut Bolonnami.

Jadi di hamu raja ni parboruonnami, huoloi hami ma pangidoanmuna i, gabe ma angkup ni na horas. Pasahat hamu ma sinamot ni borunami i. Boti ma.

RP Pa

Mauliate malambok pusu ma, Rajanami, dohononnami tu hamu, ala naung dioloi hamu pangidoannami. On pe borhat ma hami pasahathon sinamot ni anaknami, mangarade ma hamu, Rajanami.

Di hamu suhut bolonnami, borhat ma hamu pasahathon sinamot ni anakta.

Borhat ma paranak pasahathon sinamot tu parboru, alai jumolo do dipasahat tu raja parhata, asa jolo dipatangkas.

Pangoli Anak : Pasahat sinamot

Ama do na pasahat sinamot (dibagasan pinggan pasu namaris boras na pir).

Molo naung mabalu gabe Ina i ma napasathon sianamot.

Pamuli Boru : Majalo sinamot

Ina do namanjalo sinamot (tu ulos ragi hotang).

Molo naung mabalu gabe Ama namanjalo sinamot.

Dipasahat ma muse sadasada todoan tu suhi ni ampang na opat dohot panandaion.

Ama do napasat todoan, Ina na manjalo, i ma tu :

1)      Sijalo Bara;

2)      Simanggokhon;

3)      Upa parorot (Namboruna) manang upa pariban(angkangna);

4)      Upa Tulang (Tulang ni Borumuli);

5)      Surungsurng (Ompung suhut dohot Ompung bao);

6)      Ompungna (angka namrtinodohon)

7)      Bapatuana/Bapaudana;

8)      Ibotona;

9)      Namboruna/Paribanna

10)  Pengurus Punguan Parompuan;

11)  Pengurus Harian Parsadaan.

RP Pb

Nungnga dioloi hamu, jala dipasahat hamu sude pangindoannami. On pe hupasahat hami ma panghataion on tu hamu, Amangborunami, atik beha adong pangidoanmuna. Boti ma.

RP Pa

Anggo pangidoan i, Rajanami, sai na godang do, alai anggo apala di tingkion pasupasumuna i ma marhitehite ulos herbang. Sude ma hami ulosi hamu , Rajanami, molo tung so sude pe hami dapotan ulos herbang, ba ulos na tinonun sadari i ma, asal ma ris hami.

Boti ma , Rajanami.

RP Pb

Molo i do pangidoanmu, gabe ma angkup ni na horas, hupasahat hami ma ulos herbang 11 bulung. Goari hamu ma sadasada, asa pintor huulosi hami.

RP Pa

Digoari paranak ma sadasada sijalo ulos herbang.

Urutan ni sijalo ulos herbang (ulos na marhadohoan);

1)      Ulos Pansamot (Natoras ni Pangoli): ulos ragi idup );

2)      Ulos Hela (Pangoli) : ulos ragi hotang) ;

3)      Ulos Pamarai (Amanguda/Amangtua ni Pangoli): ulos ragi hotang) ;

4)      Ulos Simolohon (Haha ni Pangoli): ulos ragi hotang) ;

5)      Ulos Sihutti Ampang (Iboto na /Namboru na): ulos ragi hotang) ;

6)      Dumenggan molo boi ragi hotang (sirara);

7)      Dumenggan molo boi ragi hotang (sirara);.

8)      Dumenggan molo boi ragi hotang (sirara);

9)      Pengurus Punguan Parompuan: ulos ragi hotang;

10)  Pengurus Harian Parsadaan: ulos ragi hotang.

Sidung ma na masisisean, dung i dibagi ma uang pinggan panganan dohot uang ulosulos. Ditorushon ma muse tu na pasahat ulos holong (ulos herbang) tu pengantin sian horong ni parboru, sian hulahula dohot tulang ni parboru, dungi diuduti ma muse sian hulahula dohot tulang ni paranak.

Dung salpu i marhata sigabegabe/sihorashoras ma. Dung diampu pengantin dohot hasuhuton ni paranak di uduti ma na padalan olopolop dungi dulahon ma ulaon sadari. Dung si dungi ditutup parboru ma ulaon pesta i dohot tangiang ( dung jolo marende).

ULAON SADARI (paulak Une dohot Maningkir Tangga)

(1)   Paulak Une

Borhat ma paranak tu jabu ni parboru, diboan do indahan na las dohot pinahan lobu / na marmiakmiak (lengkap parjambaran) di bagas jual. Dipeakhon ma i tu ginjang ni meja naung pinarade.

Tarsongon on ma hatana :

Di son rodo hami paulak une, ala naung marune sude ulaon adat ni anaknami dohot boru ni Raja i. Huboan hami do lompan na tabo dohot indahan na las. Lasma rohamuna manjalo. Boti ma.

(2)   Tingkir Tangga

Ro do parboru maningkir tangga ni boruna, diboan do dengke sitiotio, boras sipir ni tondi dohot lampet, godangna 5 manang 7 tandok. Dipeakhon ma i tu ginjang ni meja naung pinarade.

Tarsongon on ma hatana:

Hami pe ro do maningkir tangga ni ianakhonnami. Nunga las rohanami, sai anggiat ma rumah tangga sitiruon on di tongatonganta, lumobi di jolo ni Tuhanta. Huboan hami do di son boras sipir ni tondi, dengke simudurudur dohot lampet, asa adong sigatonmuna di jabu. Las ma rohamuna. Boti ma. Somalna ndang pola ditutup be dohot tangiang, holan dihorashon nama 3 hali: “Horas ..... horas ................. horas !”

Tingki masijalangan, dipangido na marbaju/namboruna do uang panaru sian paranak, jala ingkon dilehon do i, ai adat do i.

Sidung ma sude ulaon na marunjuk i.

KESIMPULAN:

ADAT DO NA BALGA, ADAT DO NA METMET

Parbagason ni halak Batak na marugamo Kristen, molo dung dipenuhi 3 hukum, nungnga sah parbagason i, i ma;

1.      Hukum Pemerintah      : Berupa catatan sipil

2.      Hukum Gereja             : Pemberkatan nikah (pamasumasuon)

3.      Hukum Adat                : Pasahat /manjalo sinamot dohot pasahat/manjalo ulos na marhadohoan / ulos holong.

Asa tung metmet pe ulaon adat i, asal ma diadopi “Dalihan Na Tolu” jala terpenuhi na 3 hukum on, nunga sah parbagason i , jala nunga gok adat i. On do sada dalan tu angka na umposo, unang mabiar mangulahon adat, asa unang laho rohana, mangalua ma jo, adat di pudi, dipajolo holong dipapudi uhum, ala so boi diulahon adat na balga.

Asa talehon ma sipaingot tu angka na umposo, tumagon do ulahononhon adat nang metmet, sian na mangalua manang na so diadati.

Catatan : Marsiadu torop do nuaeng on di godang ni undangan, sipata terjadi :

1. Marsiadu mangalului hundulan, sipata hurang hundulan ni hula-hula/ tulang;

2. Adong nasotaruli mangan, kopi/teh dohot lampet;

3. Marsionjar –onjaran tingki pasahat tumpak;

4. Ndang boi be hikmat pelaksanaan ni ulaon I;

5. Habis tingki manipak sadai, sipata sahat tu borngin;

6. Ala ni lelengna gabe godang maninggalhon ulao i so jolo sidung;

7. Adong do tona ni umpunta sijolo-jolo tubu namandok :

“ Adat do nabalga, adat do nametmet”

“Metmet pe si hapor, dijujung do uluna”